दिवाळीच्या पार्श्वभूमीवर अन्न पदार्थातील भेसळ करणाऱ्यांवर कठोर कारवाई करा - राज्यमंत्री राजेंद्र पाटील-यड्रावकर

प्रफुल चव्हाण,इन इंडिया लाईव्ह 

मुंबई, दि. ५ : दिवाळीच्या पार्श्वभूमीवर मिठाईसह विविध अन्न पदार्थातील भेसळ रोखण्याचे आणि खाद्य तेलाच्या डब्यांचा पुर्नवापर करणाऱ्यांवर कडक कारवाईचे निर्देश अन्न व औषध प्रशासन राज्यमंत्री राजेंद्र पाटील यड्रावकर यांनी आज येथे दिले. मंत्रालयात त्यांनी अन्न व औषध प्रशासन विभागाच्या अधिकाऱ्यांची आढावा बैठक घेतली. राज्यातील अन्न व औषध प्रशासनाची विभागवार सद्यस्थिती जाणून घेत भेसळ विरोधातील मोहीम अधिक तीव्र करताना भेसळखोरांवर कडक कारवाई करण्याबाबत महत्वपूर्ण सूचना  पाटील यांनी दिल्या.

दिवाळी सण जवळ आला असताना खवा(मावा), पनीर, खाद्यतेल, मिठाईसह विविध अन्न पदार्थातील भेसळ रोखण्यासाठी उपाययोजना, भेसळ ओळखण्यासाठी जनजागृती तसेच भेसळ करणारी दुकाने, कंपन्या, आस्थापना, दुकानदारांवर  धाडी टाकून कडक कारवाई करण्याचे निर्देश राज्यमंत्री यड्रावकर यांनी दिले, प्रसंगी त्यांचे परवाने निलंबित करण्याची कारवाई करावी अशा सूचना त्यांनी केल्या. 

अन्न सुरक्षा व मानके कायद्यानुसार खाद्य तेलाचे पॅकिंग करण्यासाठी एकदा वापरलेल्या डब्यांचा पुर्नवापर करण्यात प्रतिबंध आहे. राज्यात अशाप्रकारे डब्यांच्या पुनर्वापर होत असल्यास त्यावर कारवाई करण्याच्या सूचना राज्यमंत्र्यांनी दिल्या. या कारवाईचा अहवाल तत्काळ सादर करण्याचे निर्देशही त्यांनी दिले.

बैठकीस वैद्यकीय शिक्षण व औषधी द्रव्ये विभागाचे सह सचिव शिवाजी पाटणकर, अन्न व औषध प्रशासन आयुक्तालयाचे सहआयुक्त शैलेश आढाव, बृहन्मुंबई विभागाचे सहआयुक्त शशिकांत केकरे, कोकण विभागाचे सहआयुक्त शिवाजी देसाई, पुणे विभागाचे सहआयुक्त सुरेश देशमुख, नाशिक विभागाचे सहआयुक्त चंद्रशेखर साळुंखे, औरंगाबाद विभागाचे सहआयुक्त उदय वंजारी, अन्न व औषध प्रशासन आयुक्तालयाचे सहाय्यक आयुक्त महेश चौधरी, अमरावती विभागाचे सहाय्यक आयुक्त सागर तेरकर, नागपूर विभागाचे सहाय्यक आयुक्त नितीन मोहिते, बृहन्मुंबई विभागाचे सहाय्यक आयुक्त पराग नलावडे आणि अन्न व औषध प्रशासन आयुक्तालयाच्या अन्न सुरक्षा अधिकारी अर्चना वानरे आदि अधिकारी उपस्थित होते.